موجــــــــــة ًًً

   مـــــــــــــــوجــــــــــــــة 



بنحلم حلم مُش لينا
ونفرح بيــــه 
ولما تلمسه ايدينا
سراب نلاقيه 
وأول ايد بتجرحنا
بتبقى ايديه 
ولما تنتهى الرحلة 
نلاقى جروحنا تسألنا 
لما الحلم مُش لينا
بنحلم ليه 
وليه قلوبنا مبتصدقش 
ان الحلم مش لينا
مبيهزرش 
وليه عقولنا مبتفكرش 
ان الحلم ده مسافر
ومبيرجعش
وان الدنيا دى موجة 

بتعلا بينا فى الهوجة 
وفجأة تقلب المركب
ولا تفرقش 
بسن الحق ولا الغش 
بين القصر ده والعش 
واللى مركبين ميت وش 

ولو مرة عاتبناها 
ليه قاسية كده معانا 
وليه دايما معاندانا 
وخانقة الحلم جوانا 
ونانسنا فيها غرقانة 
وليه على شط مبتوصلش 
تقولك اصل انا موجة 
حياتى كلها هوجة 

وعند الشط اموت مقدرش 
عليا فات وشوش ووشوش 
وعمرى اسم معرفتوش 
ومرة تاخدهم الهوجة
ومرة يغرقوا فى موجة
ومرة اكون انا الفكرة

ومرة اكون انا الشوكة
ومرة الحظ يديهم
مآسيهم ينسيهم
وتعلا فى حضنى أغانيهم 
ويجى الموت يناديهم
أوسع له ومتكلمش 
واركب م الخشب
 ميت وش 
تقولى ازاى كده
معرفش 
ما اصلا اصل انا موجة 
حياتى كلها هوجة
وعند الشط
اموت مقدرش 


حقوق الملكية الفكرية محفوطة  لـــــــ  " نــــــــــــــــــــــانسى زكريــــا "